Velbrukt Tysneshuve - konehuve

Velbrukt Tysneshuve - konehuve av svart ullstoff. Huva  består av eit nesten rundt bakstykke og eit fasongskore framstykke. Breidde midt bak er 34,5 cm, høgde midt bak 32 cm. Ullstoff og fôr av ubleika lerret er sydd saman med maskin, slik at sårkantar ligg opne inne i hua. Skoning av grovt svart ullstoff framme, sydd på med maskin. To cm brei silkekant framme. Smal svart kant rundt halsopninga med knyteband bak. Kvit list rundt andletsopninga manglar, likeins svart silkeband til å knyta rundt huva. Dette er ei Tysneshuve frå slutten av 1800-talet, jamfør maskinsaumen og storleik på huva.

Overliv med liten valk og taggerad av perler

Klassisk overliv i grønt ullstoff frå siste del av folkedraktperioden på Tysnes, kanta med svarte fløyelsband med rosemønster, samt ei rad med lyse perler innanfor, unnateke 6-7 cm under armane der det berre er eit smalt roseband. Overlivet er sydd for hand. Stoff og fôr av ubleika lerret er kasta saman og festa til den smale valken rundt livet (som er av lin eller strie) med grove kastesting. Overlivet har smal rygg, berre 9 cm brei i livet. Elles er vidde rundt livet 64 cm, høgde midt bak 38 cm, skulderbreidde 12 cm, høgde midt framme 32 cm og høgde i sida er 18 cm. Framme er det tre par ringar og fire hekter/maljer. To innsnitt framme på 5,5cm x 3/4 cm sydde med maskin, desse kan vera laga seinare.

Med sidefelt og bakstykke i same stoff

Bringekluten har perlebroderi på raudt vadmål: Blå, kvite og gull stråperler, samt småperler som dannar ein stor Andreaskross i midten og fleire åttebladsroser. Metallknipling med viftemotiv og svart fløyelsband med rosemønster øvst, dette ser ein på mange bringeklutar. Sidefelt i blått stoff med kvitt rutemønster, same stoff som bakstykket. Dette er ein nyare monteringsmåte. Truleg montert med maskin og kan henda er bringekluten montert på nytt.

 

 

Klassisk lang bringeklut med bord

 

Bringekluten har eit brodert felt på stramei 8 x 14 cm med korssting i ullgarn, samt perler. Perlemotiv av to valknutar og tre åttebladsroser, omkransa av perlerader (sikksakk, kors). Perler i mange fargar i kombinasjon med ymse grønt garn. Raud botnfarge. Svart fløyelsband med rosemønster øvst. I midten eit svart felt på omlag 12 x 13 cm. Stripete og rutete sidefelt og baksidestoff av rutete flanell. Ytre mål er 23/24 x 27 cm. Montert med maskin. Klassisk lang bringeklut med bord, frå siste del av folkedrakta.

Belte eller sele?

 

Er dette ein sele, belte eller kanskje ei stakkalinning? Har plagget vore i bruk? Slitasje kan evt. tyda på det. Men det er ikkje merke etter fôr som  er blitt spretta av. Det er brodert på tidleg stramei, eller kanskje linstoff. Broderiet måler 68 x 3,8 cm og har gjentakande rapportar på 6,7 cm av kvitperla Andreaskors og greske kors, desse er av gyldne, kvite og svarte perler, samt raude og grøne korsting. Botn er fylt ut med blå korssting. Stripe av raude korssting på eine sida, grøne korssting på andre sida, men med små mellomrom.

Bringeklut i eldre tradisjon

Bringeklut i eldre tradisjon, fint utført og godt bevart. Hovuddekor er ei stor åttebladsrose i perlenett med kvite, gull og grøne perler montert på raudt ullstoff. Metall/gullblonde med fire vifter over perlenettet, svart fløyel øvst. Felt av gammalrosa bomullstoff med tidstypisk småmønster, samt rutete lilla/svarte og kvite sidefelt. Orange silke med mønster i overkant, på begge sider av den svarte fløyelen.

Umontert liten hjartebringeklut

 

Med dette vesle hjarta - som ein gong skulle bli ein liten bringeklut ønskjer eg ei God julehelg til alle som les og følgjer bloggen min:-)

Liten umontert bringeklut av raudt ullstoff, berre 19 cm brei og 14 cm høg. Hjarta på 7,5 x 10 cm kan også likna ein engel med sirkelen i midten, og venger på sidene. Det perlebroderte hjarta av kvite perler har ei åttebladsrose og to dobbeltkors, alt av stråperler, supplert med småperler. Påbegynt kant rundt hjarta av kvite og gull stråperler. Det er sydd inn tre små metallspenner, samt ei stor perle i spissen av hjarta. Kanskje er den halvferdige bringekluten laga av eit barn?

Lite raudt overliv med eldre trekk

 

Eit lite raudt overliv. Fôr av ubleika linlerret og ullstoff er sydd saman med maskin i sidene og på skuldrene, saumar er delte men ikkje kasta over. Overlivet er skøytt på 4,5 cm nede framme. Vidde rundt livet er 64 cm, høgde midt bak 37 cm, ryggbreidde i livet er 9 cm og skulderbreidde er 10 cm. Kvara med to cm brei, svart fløyel med kvit perlerad innanfor. Ein del perler er falle av eller fjerna på høgre framstykke. Det manglar tre cm fløyel og perler under ermane, dette er erstatta med eit smalt band. Overlivet er lukka med fire par hekter/maljer. Merke etter krokar i livet til å hekta stakken på. 

Silkesjal med ikatfarga mønsterbord

Velbrukt blått silkesjal med ikatfarga mønsterbord langs kantane. Dei vevde stripene går 9 cm inn frå kantane. Dette er importvare, som også høyrde med til dei gamledraktene, saman med heimlege tekstilar. Sjalet måler omlag 62 x 59 cm og har ein handsydd smal fald, jare på ei side.

Svart forkle med striper og ruter

Dette svarte forkleet, truleg av ull og silke har striper og ruter i lilla/rosa. Det er handsydd, har jare på begge sider og er difor ikkje falda inn der. Høgde omlag 80 cm medrekna blonden på 4 cm, breidde 66 cm. I livet er det lagt tre djupe legg på kvar side av eit 11,5 cm breitt midtfelt og montert til ei 24,5 cm lang linning. Oppå linninga eit smalt og 101 cm langt svart band med siksakkmønster som ender i knyteband. Forkleet er falma på rettsida. Slike forkle var vanlege kring i Sunnhordland.

Detalj av stripemønster og blonde

Kvinnesokkar i svart ullgarn

Kvinnesokkar i svart ullgarn. Heile sokken er strikka i glattstrikk, med auking og felling bak på leggen. Øvst er to cm bretta over på vranga, med ein fin taggekant i bretten. Lengde frå kne til hæl er 62 cm, fotlengde 22,5 cm. Vidde øvst er 17cm, ved ankel 10 cm, det same i foten (sju cm frå tærne). 

Selar med perler og korssting

Selane har broderi med perler og korssting, truleg på stramei. Gjentakande rapportar av romber/Andreaskors med blå, svarte, raude og kvite perler, åttebladsroser i raudt garn og svarte, blanke og sølv perler. Botn er fylt ut med grønt, samt ei rad raudt garn. Langs ytterkanten eit fløyelsband med rosemønster, ein cm breitt. Selane er 5 cm breie, 81/82 cm lange medrekna eit ca 11 cm langt endestykke. Knapphol (2,5 cm) under hemper bak. Bakstykke truleg av ubleika linstoff. Selane verkar velbrukte og hempene bak er slitte og er delvis blitt fornya. Selane har maskinstikningar i kryss på endestykka og er delvis montert med maskin. Dei maskinsydde endestykka kan evt. vera sekundære.

 

Bringeklut med bokstavar og raude roser

Bringekluten har ei tettsauma bord på stramei 7 x 14,5 cm med tre raude roser og grøne blad i garn og bokstavane AMMDH nedanfor, sydde med grøn/blå perler. Litt grøne, kvite, svarte og raude perler i roser og blad. Botnen er fylt ut med lilla garn. Grønt felt av ullstoff på 14 x 14,5 cm. Øvst ein kvaring av svart fløyelsband med rosemønster. Dette dekker eit smalare, slitt rosete band under. Både sidefelt og baksidestoff er av brunt/rosa/svart-rutete stoff. Monteringa med maskin er truleg sekundær, ikkje minst kan dei skråsydde hjørna tyda på dette. Ytre mål er 27 x 28,5 cm. 

Bringekluten med bokstavar

Bringekluten har tettsauma broderi på stramei 6 x 13,5 cm med tre åttebladsstjerner og to romber, perleborder og bokstavane KKDV under, alt sydd med blanke perler, men supplert med oker, raudt og blått garn, omframt botnen som er fylt ut med leggjesaum i grønt ullgarn. Det blå og svarte feltet med diagonale ruter og små åttebladsroser måler kan vera eit silkestoff. Blå/kvite sidefelt 3 x 20 cm. Øvst ei stripe med blålilla silke og eit svart fløyelsband med rosemønster. Bringekluten er montert med symaskin, direkte på det stripete baksidestoffet, som også er falda med maskin. Ytre mål er 28 cm x 22 cm. Bringekluten har den breie forma som var vanleg i periden med korte overliv, men er nok frå etter 1870, både på grunn av maskinsaumen og at det er brodert på stramei og ikkje lin.

 

Raud ermetrøye i bomullsstoff

                                       

Forseggjort klutatrøye i bomullsstoff, raud botn med svart stjernemønster. Under knapphola er det eit rutete belegg på omlag fire cm. Trøya er lukka med ti knappar/knapphol framme og ein knapp/knapphol på kvar mansjett. Trøya er maskinsydd og har smal rygg (11,5 cm i livet). Fôret av ubleika linlerret og det raude stoffet er sydd saman både i bol og ermar og saumane er kasta over for hand. Skråklipt kant 1 x 35 cm i hals. Dei vide ermane (21/22,5 cm) er sydde glatt til bolen, men lagt i legg til mansjettar som måler 19 x 3 cm. Vidde over brystet er 80 cm, livvidde 68 cm, rygghøgde 36 cm, høgde i sidene 18 cm, skulderbreidde 11 cm og ermane er 59/56 cm lange. Sekundært er det sydd to innsnitt for hand på 1,2 x 11 cm, 7- 8 cm frå framkantane. Slike ermetrøyer, som ofte var raudlege med mønster i, høyrer til den seinare perioden av folkedrakta. Ein kan sjå enkelte foto av kvinner i ermetrøye og (truleg) grønt overliv langt inn på 1900-talet.