torsdag 21. januar 2021

Bringeklut med krune- eller tulipanmotiv


Denne bringekluten har ei brei bord (7,6 x 14,5 cm) med korstyngsbroderi på stramei i raudt, grønt, lysegult, svart, samt blå-lilla botnfarge. Motiv er to grøne romber med Andreaskors inni og seks raude kruner - eller kanskje er det stiliserte tulipanar? Svart fløyelsband med rosemønster øverst. Felt av grønt ullstoff 14,5 x 17 cm nedanfor broderiet. Baksidestoffet av stormønstrete flanell er lagt fram på forsida to og tre cm. Fint montert med handsaum, evt. kan sidefelta av gammalrosa bomullsstoff vera sydd til med maskin. Fin liten detalj med lillamønstrete bomullsstoff bak fløyelsbandet. Ytre mål er 28 x 29,5 cm. Dersom teorien min om krunemotiv er rett er det tenkjeleg at dette kan ha samanheng med kampen om unionsoppløysinga kring 1900. Bringekluten har også ei form som var vanleg på slutten av 1800-talet.



lørdag 16. januar 2021

Grønt overliv utan fôr


Grønt koneliv i kraftig ullstoff, utan fôr. Kanta med vevde band med kvite perletaggar innanfor (unnateke ca 3 cm under ermane og 6 cm framme). Overlivet er skona på vranga med rutete, tynt bomullsstoff 4 cm breitt framme, og brunt bomullsstoff 2 cm breitt rundt halsen. Vidde i livet er 71 cm, rygghøgde 39 cm, skulderbreidde 11 cm, høgde i sida 19 cm og høgde framme til snipp er 30 cm. Ryggen smalnar inn nede til 7 cm i livet. Det verkar som slike liv i tjukt ullstoff/vadmål er utan fôr. Saumane er som her ofte lagt fint inntil og kasta over. Maskinsydd kant nede. Bandet er grindvove i raudt ullgarn, omlag 3 cm breitt med blå romber og grøne Andreas-kors. Blå og grøne striper på sidene og kvit kant. Ein rapport er omlag 3 cm. Sjå liknande vove band i forrige innlegg.











 

søndag 10. januar 2021

Grindvove band

 


Grindvove band i raudt og blått ullgarn. Motivet er innramma av blå striper på sidene, og med ein kvit bomullskant på eine sida. Motiv er romber og Andreaskors. Ein rapport er omlag 3,5cm lang. Heile bandet måler 3,9 x 190 cm. Det kan ha vore tenkt til kanting av overliv eller kanskje også til stakkalinning?

Bandet sett frå retta

Bandet sett frå vranga
   



torsdag 7. januar 2021

Bringeklut med perlevev


Fint handmontert bringeklut med ei bord av perlevev (4 x 14 cm) med stilisert bladmotiv: Blå perler i botnen, motivet er i ulike farga perler. Kvite perletaggar er sydd på nedanfor vevborda. Øverst ein kant av 2,5 cm raudt ullstoff, med eit tidstypisk sikksakk metallband over. Grønt felt av ullstoff 14 x 20 cm nedanfor perlevborda. Blå- og kvitruta sidefelt. Litt uvanleg at det ikkje er eit felt av bomullsstoff nederst. Ein kant av baksidestoffet i ubleika kraftig bomullsstoff viser framme. Ytre mål på bringekluten er 27 x 27 cm. Perlevev ser ein på enkelte bringeklutar, men det er meir vanleg med geometriske motiv. Motivet tyder på at dette er ein bringeklut frå slutten av 1800-talet.






 

søndag 3. januar 2021

Fargerik bringeklut


Fargerik, handmontert bringeklut frå siste del av 1800-talet. Borda med perlebroderi på stramei måler 6 x 13 cm. Det er sydd med blå, kvite, oker og svarte perler. Motiv er to halve og ei heil rombe i midten, med små romber inni dei store. Dette er innramma av to rader med burgunderraude, svarte og oker trekantar som dannar smale border. Sidefelt av paisley-mønstra bomullsstoff. Øverst ein kant av 2,5 cm raudt ullstoff med eit metallband over. Zic zac metallband nedanfor broderiet på felt av grøn fløyel som måler 15,5 x 13 cm. Slike metallband er typiske for denne tida. Baksidestoff av blå- og raudruta bomullsstoff. Ytre mål på bringekluten er 25,5 x 29 cm. 
Fint utført perlebroderi på stramei


Baksidestoffet er skøytt midt på

 

fredag 1. januar 2021

Nydeleg liten bringeklut med hjartemotiv


Nydeleg enkel liten bringeklut som truleg høyrer til den gamle draktskikken med korte overliv. Øverst ein kant av tre cm blå silke, dekka med ein vifteforma gullknipling. Midtfelt av raud ullbrokade 13 x 19/20 cm. Perlebrodert hjarta av gull, blå og blanke stråperler, samt kvite og blå småperler i ulike nyansar. Tre stjerner og små blå rosettar inni hjarta. Ytterst eit metallband. Rosa/lysstripete sidefelt. Baksidestoffet er i same stoff som sidefelta, det er skøytt nederst. Alt er handsydd. Bringekluten måler 29 x 21,5 cm.








 

onsdag 30. desember 2020

Grindvove band


Grindvove band i svart, blått og raudt ullgarn. Motiv er vekselsvis blå Andreas-krossar og raude hjarte som er sett saman til firbladsroser. Slike hjarte har ei magisk tyding, og står sjølvsagt også for kjærleik. Bandet måler 104 x 3,2 cm. Ettersom det er merke etter hekter/hemper kan dette ha vore ei stakkalinning. Her ser me rettsida øverst og vrangsida nederst.


søndag 27. desember 2020

Hardanger/nasjonalliv med smal rygg


Overlivet er kanta med svarte fløyelsband med rosemønster, kvite perletaggar innanfor. Ein brei kant av raudt stoff i livet. Fôr av bomullslerret. Breidde rygg 33/14 cm (smalnar inn mot livet), høgde rygg 38 cm, skulderbreidde 10 cm og høgde i sida er 20 cm. Fløyelsbanda er sydd på med maskin. Typisk "nasjonalliv",  men med smal rygg slik dei siste Tysnesliva hadde.


onsdag 23. desember 2020

Perlevevd belte

Dette flotte perlevevde beltet måler 76 x 2,8 cm. Det er nytta kvite, oker, blå, mørkeblå eller svarte perler. Gjentakande motiv er åttebladsstjerner og Andreaskors med små firkantar inni. Fôr av raudt bomullsstoff. Beltet er lukka med to par hekter og maljer. Denne typen belte er blitt nytta til nyare bunadsbruk, til "nasjonalen". Men teknikken perlevev finn ein også som bord på enkelte eldre bringeklutar.

søndag 20. desember 2020

Klasssisk "nasjonalliv"


Klasssisk "nasjonalliv" i raudt ullstoff, montert med maskin. Kanta med svart fløyelsband med rosemønster og metallband innanfor. Fôr av bomullslerret. Brei rygg 27/36 cm. Høgde rygg 38,5 cm, skulderbreidde 11,5 cm og høgde i sida er 21 cm. Merke etter tre par hekter framme. Merk at dette overlivet ikkje har den smale ryggen som dei siste Tysnesliva i folkedrakttradisjonen hadde. Desse overliva er likevel ein del av historia vår, då folkedrakta vart erstatta av Hardangerbunad i form av "nasjonalen" og berre til høgtidsbruk.



søndag 13. desember 2020

Raudt lite overliv


Dette vesle overlivet av raudt ullstoff er kanta med omlag 2,5 cm brei svart fløyel. Eit smalt sølvband innanfor fløyelskanten langs halsen og framme. Ein liten kant av fôret av bomullslerret er bretta fram i livet. Heile plagget verkar handsydd. Overlivet har brei rygg (21,5 cm), høgde bak er 31,5 cm, vidde rundt livet 68 cm, skuldrene er 8 cm breie og høgde til snipp framme er 25 cm. Dette overlivet har både eldre (brei rygg, handsaum) og nyare trekk (smalt sølvband, kanting som går heilt saman under ermane). Dei nyaste trekka peiker mot at dette er eit "nasjonalliv".


søndag 6. desember 2020

Grønt koneliv utan fôr

 
Koneliv i kraftig ullstoff/vadmål, kanta med svarte fløyelsband med rosemønster, eit stykke smalt kypertvevd svart band under ermane og framme. Rutete skoning/kant i livet. Ryggen smalnar av nede og er berre 11 cm brei i livet. Rygghøgde er 35 cm, skulderbreide 11 cm og høgde i sida er 17 cm. Overlivet er ufôra og har svart skoning av ullstoff på vranga rundt halsen og framme. To par hekter/maljer i livet. Overlivet verkar handsydd. - Dette overlivet liknar mykje det forrige, men er utan fôr og har heller ikkje perletaggar innanfor fløyelsbandet. Dette var heller ikkje vanleg når ullstoffet var så kraftig. På denne type overliv kan ein også sjå vevde band, desse kunne vera produsert lokalt, men kjøpeband var kan henda meir stas! Slike overliv med smal rygg representerer siste rest av den gamle folkedrakta på Tysnes, før ein gjekk over til lokale variantar av Hardangerbunad, eller "nasjonalen". På gamle foto frå særleg 1880-åra kan ein sjå slike overliv.



søndag 29. november 2020


Dette overlivet i grønt ullstoff er kanta med svarte fløyelsband med rosemønster, kvite perletaggar innanfor. Ein smal kant av fløyel under ermane. Rutete liten skoning/kant i livet. Ryggen smalnar av nede og er berre 7,5 cm brei i livet. Rygghøgde er 36 cm, skuldrene på 11, 5 cm er litt tilbaketrekte. Overlivet er fôra med linstoff eller grovt bomullslerret og verkar for det meste handsydd. I livet er det merke etter to par hekter/maljer. Slike overliv med smal rygg representerer siste rest av folkedrakta, før ein gjekk over til lokale variantar av Hardangerbunad, eller "nasjonalen".











fredag 20. november 2020

Sele eller belte med bladmotiv



På denne selen ser me det klassiske bladmotivet, som vart svært vanleg på slutten av 1800-talet, men her med små geometriske figurar i mellom. Det er truleg sydd på stramei. Kvar rapport er omlag fire cm lang. Blada har perler som er gjennomskinlelege, raude, blå og oker. I dei små firkantane mellom blada er det også svarte perler. Botnen er fylt ut med grønt ullgarn i korsstyng. Selen er kanta med svart fløyelsband med rosemønster. Bakstykket er truleg av lin, evt bomullsstoff. Kanskje har selen blitt brukt som belte seinare.

lørdag 14. november 2020

Fin gammal bringeklut


Denne enkle, fine bringekluten har perledekor av kvite, gull og blå stråperler og småperler: To åttebladsstjerner over kvarandre, med halve åttebladsstjerner rundt, alt montert på eit raudt ullstoff som måler 13,5 x 13,5 cm. Det raude stoffet, som er skøytt nede, er sydd fast til eit tynt linstoff (23,5 x 21 cm) med leggsaum over ein mørk tråd. Ein liten kant av dette bakstykket er bretta fram. 4,5 cm svart fløyel øverst. Denne bringekluten har tydelege teikn på at den kan høyra til den eldre folkedrakttradisjonen (før 1860-70); er kort, handmontert rett på linstoff og med leggsaum. Bringekluten kan verka enkel, men har nok vore nytta til høgtid og stas.