søndag 15. mai 2022


Velkommen til utstillingsopning «Tidemand i miniatyr – Dokker i Folkedrakt etter Adolph Tidemann sine draktstudier» 

LES MEIR HER  Utstillingsopning med føredrag – «Tidemand i miniatyr»




tirsdag 3. mai 2022

Enkel liten bringeklut

 



Enkel, liten bringeklut. med perledekor: Gyldne stråperler, kvite og oker perler er montert på ein halv oval av grønt ullstoff (17 brei og 13 cm høg), festa til baksidestoffet med leggsaum med raud ulltråd og lingarn. Motiv er tre greske kors og fire stjerner/kors, samt kvite små perla kors. Motiva er ruta opp med metalltråd. Øvst ein kvarde av raudrosa silkeband og metalltråd. Perlene er sydd gjennom til baksidestoffet som er av  blått/lyst stripete linstoff, falda med lintråd.  Kvit  linkant øvst.  Alt er sydd for hand. Breidde 25 cm, høgde 20,5 cm.








søndag 17. april 2022

Perlebroderte selar


Desse selane er heilt overbroderte med perler. Det er truleg brodert på linstoff. Gjentakande rose- og bladmønster av grå, kvite, gule, lilla, grøne og blå perler. Botnen er fylt ut med burgunder perler. Raude og olivengrøne snorer er sydde i krossmønster på endestykka. Bakstykkestoff av ubleika lin, i endane ser det ut til å vera bomullsstoff. Tre cm lange knapphol på dei spisse endestykka. Selane er montert for hand og er 5,5 cm breie og 90 cm lange, medrekna  omlag  9 og 10 cm lange endestykke. Den gamle symbolbruken er borte og erstatta med nye former og mønster, med nytt innhald.







torsdag 7. april 2022

Barnebringeklut?

 

Liten bringeklut med perlenett montert på raudt stoff, truleg lin. Motiv er ei stor åttebladstjerne og romber av kvite, grøne, blå og oker perler. Kvite perletaggar rammar inn perlenettet. Øvst ein svart fløyelskvarde. Bakstykke av grovvevd ubleika bomullsstoff. Bringekluten er 15 cm høg og 17cm brei og er montert for hand.

torsdag 24. mars 2022

Bord til bringeklut med bokstavar

 


Dette er broderi til ein bringeklut som aldri kom i bruk! Det er sydd med tynt ullgarn på stramei med korssting og perler. Raude korssting i botnen, blått og grønt garn inni motiva. Tre perla og sydde "kruner" med kvite, svarte, gjennomskinlege og "gull" perler. Små rosettar med gjennomskinlege og raude perler rundt "krunene". Bokstavane MODH er brodert med rosa garn. Broderiet er 6,5 cm høgt, er umontert og utan bakstykke.



søndag 13. mars 2022

Grønt overliv med grindvovne band

Grønt overliv i kraftig kypertvove ullstoff, kanta med tre cm breie grindvovne raude band med blå hjarterosettar (kløver). Banda går ikkje heilt ned midt foran, og det manglar fire cm band under ermane, dette var vanleg. Hekte/malje der banda sluttar framme. Valk i livet, omlag fem cm i omkrins. Overlivet er utan fôr, men med skoningar av stripete bomullsstoff rundt halsen og framme. Side- og skuldersaumar er maskinsydde og bretta til sides. Ryggen skrår inn til berre 14 cm i livet. Andre mål: Vidde i livet 77 cm, høgde midt framme 35 cm, høgde i sida 22 cm, rygghøgde 40 cm og skulderbreidde 13 cm.  Overlivet høyrer til den siste epoken med folkedrakter.







 



tirsdag 1. mars 2022

Klassisk bringeklut med bord

 



Bringekluten har eit brodert felt på stramei 6,5 x 16,5 cm med korssting i ullgarn, samt perler. Motiv er romber/greske kors, samt små kors, omkransa av ymse perlerader. Kvite, gjennom-skinlege, brunlege, svarte og blå perler, i kombinasjon med raudt og gult garn, grønt i botn. Kvaring av to cm raudt stoff øvst. Svart felt av brokadestoff 14,5 x 16,5 cm. Sidefelt med mønster som peiker bakover i tid. Bakstykkestoff av stripete bomullsstoff. Ytre mål  er 23 x 26 cm. Klassisk lang bringeklut med bord, brukt til seinare overliv. Avstiva med papp og truleg montert for hand.



fredag 18. februar 2022

Velbrukt Tysneshuve - konehuve



Velbrukt Tysneshuve - konehuve av svart ullstoff. Huva  består av eit nesten rundt bakstykke og eit fasongskore framstykke. Breidde midt bak er 34,5 cm, høgde midt bak 32 cm. Ullstoff og fôr av ubleika lerret er sydd saman med maskin, slik at sårkantar ligg opne inne i hua. Skoning av grovt svart ullstoff framme, sydd på med maskin. To cm brei silkekant framme. Smal svart kant rundt halsopninga med knyteband bak. Kvit list rundt andletsopninga manglar, likeins svart silkeband til å knyta rundt huva. Dette er ei Tysneshuve frå slutten av 1800-talet, jamfør maskinsaumen og storleik på huva.



mandag 7. februar 2022

Overliv med liten valk og taggerad av perler


Klassisk overliv i grønt ullstoff frå siste del av folkedraktperioden på Tysnes, kanta med svarte fløyelsband med rosemønster, samt ei rad med lyse perler innanfor, unnateke 6-7 cm under armane der det berre er eit smalt roseband. Overlivet er sydd for hand. Stoff og fôr av ubleika lerret er kasta saman og festa til den smale valken rundt livet (som er av lin eller strie) med grove kastesting. Overlivet har smal rygg, berre 9 cm brei i livet. Elles er vidde rundt livet 64 cm, høgde midt bak 38 cm, skulderbreidde 12 cm, høgde midt framme 32 cm og høgde i sida er 18 cm. Framme er det tre par ringar og fire hekter/maljer. To innsnitt framme på 5,5cm x 3/4 cm sydde med maskin, desse kan vera laga seinare.





lørdag 5. februar 2022

Med sidefelt og bakstykke i same stoff



Bringekluten har perlebroderi på raudt vadmål: Blå, kvite og gull stråperler, samt småperler som dannar ein stor Andreaskross i midten og fleire åttebladsroser. Metallknipling med viftemotiv og svart fløyelsband med rosemønster øvst, dette ser ein på mange bringeklutar. Sidefelt i blått stoff med kvitt rutemønster, same stoff som bakstykket. Dette er ein nyare monteringsmåte. Truleg montert med maskin og kan henda er bringekluten montert på nytt.




 





 

tirsdag 18. januar 2022

Klassisk lang bringeklut med bord

 


Bringekluten har eit brodert felt på stramei 8 x 14 cm med korssting i ullgarn, samt perler. Perlemotiv av to valknutar og tre åttebladsroser, omkransa av perlerader (sikksakk, kors). Perler i mange fargar i kombinasjon med ymse grønt garn. Raud botnfarge. Svart fløyelsband med rosemønster øvst. I midten eit svart felt på omlag 12 x 13 cm. Stripete og rutete sidefelt og baksidestoff av rutete flanell. Ytre mål er 23/24 x 27 cm. Montert med maskin. Klassisk lang bringeklut med bord, frå siste del av folkedrakta.




tirsdag 11. januar 2022

Belte eller sele?

 


Er dette ein sele, belte eller kanskje ei stakkalinning? Har plagget vore i bruk? Slitasje kan evt. tyda på det. Men det er ikkje merke etter fôr som  er blitt spretta av. Det er brodert på tidleg stramei, eller kanskje linstoff. Broderiet måler 68 x 3,8 cm og har gjentakande rapportar på 6,7 cm av kvitperla Andreaskors og greske kors, desse er av gyldne, kvite og svarte perler, samt raude og grøne korsting. Botn er fylt ut med blå korssting. Stripe av raude korssting på eine sida, grøne korssting på andre sida, men med små mellomrom.





onsdag 5. januar 2022

Bringeklut i eldre tradisjon



Bringeklut i eldre tradisjon, fint utført og godt bevart. Hovuddekor er ei stor åttebladsrose i perlenett med kvite, gull og grøne perler montert på raudt ullstoff. Metall/gullblonde med fire vifter over perlenettet, svart fløyel øvst. Felt av gammalrosa bomullstoff med tidstypisk småmønster, samt rutete lilla/svarte og kvite sidefelt. Orange silke med mønster i overkant, på begge sider av den svarte fløyelen.






torsdag 23. desember 2021

Umontert liten hjartebringeklut

 

Med dette vesle hjarta - som ein gong skulle bli ein liten bringeklut ønskjer eg ei God julehelg til alle som les og følgjer bloggen min:-)

Liten umontert bringeklut av raudt ullstoff, berre 19 cm brei og 14 cm høg. Hjarta på 7,5 x 10 cm kan også likna ein engel med sirkelen i midten, og venger på sidene. Det perlebroderte hjarta av kvite perler har ei åttebladsrose og to dobbeltkors, alt av stråperler, supplert med småperler. Påbegynt kant rundt hjarta av kvite og gull stråperler. Det er sydd inn tre små metallspenner, samt ei stor perle i spissen av hjarta. Kanskje er den halvferdige bringekluten laga av eit barn?


mandag 20. desember 2021

Lite raudt overliv med eldre trekk

 


Eit lite raudt overliv. Fôr av ubleika linlerret og ullstoff er sydd saman med maskin i sidene og på skuldrene, saumar er delte men ikkje kasta over. Overlivet er skøytt på 4,5 cm nede framme. Vidde rundt livet er 64 cm, høgde midt bak 37 cm, ryggbreidde i livet er 9 cm og skulderbreidde er 10 cm. Kvara med to cm brei, svart fløyel med kvit perlerad innanfor. Ein del perler er falle av eller fjerna på høgre framstykke. Det manglar tre cm fløyel og perler under ermane, dette er erstatta med eit smalt band. Overlivet er lukka med fire par hekter/maljer. Merke etter krokar i livet til å hekta stakken på.