Dåpshuve med blå silkekant og perler

Treblads huve av mønstrete bomullsstoff. Stoff og fôr (av tynt ubleika linlerret) er sydd saman. Saumane er bretta til sides og sydd ned i stoffet. Sidestykka er ca 8 x 10 cm. Midtstykket måler ca 3 cm bak og 5 cm framme og er ca 21 cm langt. Blå silke rundt heile huva, 0,7 og 2 cm brei. Kvit perlerrad med taggar framme. 15 cm gulmønstra knyteband av silke. Huva verkar handsydd og er fint utført. Dette kan verka som ei enklare utgåve av forrige huve.

Dåpshuve med blå silke og perler

Nydeleg handsydd treblads dåpshuve, kanta med blå silke. Sidestykka måler ca 7 x 10 cm. Midtstykket er ca  21 cm langt og 5 cm breitt (framme). Blonde rundt heile huva, framme er blonden lagt i legg. Kvite perler tredd i fleire rader langs den blå silkekanten og over saumar.  Fôr av rosa/kvitstripete bomullsstoff. 18 cm knyteband av mønstra silkeband. Tilsvarande stoff er funne på sjal til ei dansk folkedrakt. Og liknande mønstra stoff var å få kjøpt på IKEA til om lag 2010! I Fusa er dette stoffet brukt til forkle på rekonstruert bunad.

Kvit Barnehuve i stripete bomullsstoff

Treblads barnehuve av bomullsstoff som kan likna gammalt lakenstoff, fôra med liknande stoff. Sidestykka er ca 7 x 11,5 cm og skrår bakover. Midtstykket ca 20 cm langt. Ikkje løpegang nede, men restar etter knyteband. Ein smal kjøpeblonde er lagt i jamne folder langs framkanten. Huva er fint utført i maskinsaum. Huva kan ha blitt brukt under ei kulørt huve, slik at blondekanten titta fram. Ber preg av mykje bruk.

Kvit barnehuve utan fôr

Treblads barnehuve utan fôr. Bomullsstoffet liknar det som kunne bli brukt til lakenstoff. Sidestykka er ca 9 x 11 cm og skrår bakover. Midtstykket er ca 20 cm langt. Ikkje løpegang nede, men rester etter rosa knyteband. 1,5 cm brei kjøpeblonde er lagt i jamne folder langs framkanten. Huva er fint utført i maskinsaum. Ber preg av mykje bruk! Huva kan ha blitt brukt under ei kulørt huve.

Bringeklut med bord og botn

Bringeklut med bord og botn, 30 cm brei og 26 cm høg. Brodert bord i korsstyng - ullgarn på stramei 6 x 14 cm i blått, grønt og orange, raud botnfarge. Motiv er romber og åttebladsrose i midten. Rutete stoff 4,5 x 6 cm på kvar side. Det mørkeblå midtfeltet i ullstoff måler 19 x 16 cm og er sydd til baksidestoffet med leggsaum over ein gul ulltråd.  Baksidestoffet av ubleika linlerret har ein smal fald mot vranga rundt tre sider, sydd med små faldesting. Bringekluten har den typiske borda oppe, men har likevel eldre trekk, med den firkanta forma, handsaum og enkelt baksidestoff. 

Bringeklut med mykje perler

Eldre type bringeklut brukt til kort overliv. Bringekluten er 17,5 cm høg og 29 cm brei. Øverst ein svart fløyelskvaring 4 cm. Det raude ullstoffet på 14 x 16 cm er dekka med perlebroderi av sølv stråperler og grøne og kvite perler. Motiv er romber med åttebladsroser inni. Kvite perler dannar eit fint ruteemønster. Gullknipling øverst og smale gullband på sidene. Alt er montert rett på baksidestoffet som er av stripete ullstoff og kanta med grønt og raudt band. Tilsvarande bringeklutar er også blitt brukt i Hardanger. Dette er ein påkosta bringeklut med mykje perler. Alt er sydd for hand.

Bloggen får omtale på "Tysnesingen"

Britt Kjellesvik Rage har hatt stor interesse for folkedrakter heilt sidan ho gjekk på kunstlina på Langhaugen gymnas på 1970-talet. Det resulterte i ei særoppgåve som sidan vart til boka: «Folkedrakter i Sunnhordland – frå Tysnes på 1800-talet». Seinare bidrog ho til utstillinga «Vår fargerike fortid» på Sunnhordland museum, og ho har også skrive ein artikkel om emnet i Sunnhordland Årbok 2007. Ho har hatt fleire utstillingar med gammalt draktmateriale, både på Tysnes folkebibliotek og i hennar eige galleri på Breidablikk på Gjerstad.  LES MEIR... https://tysnesingen.no/bloggar-om-folkedrakter/

Blå barnehuve

Nydeleg treblads barnehuve av blått bomullsstoff med brune og kvite prikkar. Fôr av ubleika tynt linstoff. Sidestykka er ca 9,5 x 12 cm. Midtstykket er 21,5 cm langt. Kant av brunruta stoff nede. Langs halsopninga er huva kanta med 1,5 cm raudrosa sikleband, smale kroklisser innanfor. 15 cm rosemønstra knyteband i lin. Huva er fint utført, truleg berre i handsaum. Ber preg av mykje bruk.

Belte med perler og applikasjon

Dette flotte beltet er 5,5 cm breitt og 73,5 cm langt. Det har gjentakande mønster av to ulike åttebladsroser, applikert og perla på raudt ullstoff. Stavar av svarte små perler mellom kvar stjerne. Gyldne og grøne stråperler, svarte, gyldne, grøne og mjølke/kvite småperler, samt halvstore kvite perler. Åtte rosettar rundt kvar stjerne. Beltet er avstiva, har metallsnor rundt og er lukka med to hekter og hemper. Fôret er av ubleika lin- eller bomullsstoff. Dette er eit eldre type belte som kan ha vore brukt til kort overliv. Beltet verkar velbrukt og ein del perler er skifta ut med alternative, og tråder er løsna. Tilsvarande belte vart også brukt i Hardanger.

Bringeklut med forseggjort brodert bord

Denne typen bringeklut frå tidlegast siste del av 1800-talet finst det mange av, likevel er ingen heilt like! Denne har ei brodert bord i  smøyg med ullgarn på stramei 5,5 x 14 cm i fargane blått, grønt og lilla, fylt ut med raudt i botnen. Blå broderte "kroklisser" over og under borda. Kvit perlerad med taggar avsluttar mønsteret. Øverst er det svart silkeband med roser. Midtfeltet i grønt ullstoff måler 21 x 21cm. Bringekluten kan sjå enkel ut, men det heildekkande broderiet er forseggjort og i spenstege fargar. Bringekluten har rutete sidefelt, er fôra med ubleika lerret og montert med maskin.

Påkosta bringeklut

Flott, påkosta bringklut av eldre type, truleg brukt til kort overliv rundt 1850, eller før. Svart fløyel øvst, ein gullknipling med fem vifter er montert på fløyelen. Perlenett med rombemønster måler 11,5 x 18 cm. Det er brukt perler i fargane kvitt, oker, blått, grønt, samt litt raude, svarte og lyse/rosa perler. Dette er fleire fargar enn ein vanlegvis finn i perlenett. Perlenettet er montert på raudt ullstoff som igjen er fint montert rett på eit brunt, kypertvevd bomullsstoff med små kastestyng over ein gul og grøn tråd. Dette er ein symåte som går langt tilbake i tid. Det brune stoffet er falda for hand og bringekluten er utan bakstykke. 

Tysneshuve med rutete fôr

Denne Tysneshuva er av svart tynt ullstoff og består av eit nesten rundt bakstykke og eit fasongskore framstykke. Breidde midt bak er 34,5 cm, høgde 32 cm. Ullstoff og fôr er sydd saman med maskin, slik at sårkantar ligg opne inne i hua. Svart silkeband framme, med skoning av grovt svart ullstoff under, delvis sydd på med maskin. Den kvite lista manglar på denne huva. Fôr av ubleika lin og brunrutete bomullsstoff. Truleg har det vore knyteband bak. Usikkert om det har vore brukt valk i huva. Huver i Os og Fusa kan ha liknande fasong (same draktområde), men er høgare. 

Tysneshuve av svart fløyel

Tysneshuva består av eit nesten rundt bakstykke (på denne huva 33 x 32 cm) og eit fasongskore framstykke. Fløyelshuver var til stor stas! Denne huva har også eit spesielt silkeband; det verkar som ein blonde er lagt over det svarte silkebandet. Fløyel og fôr (av ubleika lin/lerret) er sydd saman med maskin, sårkanten er kasta over for hand. Dobbel skråklyppt bomullslist 3 x 38 cm er festa til det svarte silkebandet/blonden. Denne lista kunne sprettast av og vaskast eller skiftast. Løpegang med knyteband i nakken. Det er usikkert om det har vore brukt valk inni huva.

Kvitt forkle med hekla blonde

Dette spesielle kvite forkleet er 93 cm langt og 69 cm breitt. I livet er vidda samla med tre gruppelegg til 37,5 cm. To cm brei linning som held fram rundt livet, totalt 81 cm. Knapp og knapphol i sida. Fire biser som startar 15,5 cm frå nedre forklekant. Kantbord nede av ein 10,5 cm brei hekla blonde med sju taggar. Blonden er hekla ut frå kvar rose. Forkleet er maskinsydd. Dette liknar på forkle brukt i Fana, men i Fana plar det vera ei innfelt bord og evt dekor på sidene. Forkleet kan vera frå slutten av 1800-talet (jfr. lengda) - før "nasjonalen" - eller kanskje mykje seinare?

Svart forkle - moteplagg

Dette er eit seint forkle påverka av kjolemoten, maskinsydd. Det er 65/73 cm langt og 63 cm breitt. I livet er det lagt seks djupe legg på kvar side slik at vidda oppe blir 30 cm. Stoffet er bretta ned til linning. Knyteband. Brei blonde på sidene og nede, der forkledet er boga. Stoffet, som  kan vera glansa bomull, har striper i seg. Slike svarte forkle vart brukt til kjolemote (eller skjørt og bluse). Ein kan gjerne seia at dette er ei påkosta utgåve av forkleda med tre breidder, såkalla "serveringsforkle".

Svart forkle med lilla og grøne striper

På Vestlandet var det vanleg med silkeforkle frå siste del av 1800-talet. Dei var ofte svarte med lilla og grøne vertikale og horisontale striper. Det er blitt vove slike silkeforkle til bunad i seinare tid. Forkle eller stoff har truleg også vorte importert med sjømenn, som konegåver. Dette forkleet har striper i raudlilla og grønt, to breie og to smale vertikale, samt horisontale striper nede. Forkleet er 73 cm langt og 68 cm breitt, har jare i begge sider og er elles maskinsydd. I livet er det to djupe legg på kvar side slik at vidda blir 45 cm. Snora som er festa til livet held fram som knyteband. Nede er det ein fem cm brei blonde, som er fint avslutta med ein firkant svart silkestoff i kvar side.

Bringeklut med spennande fargar

Bringekluten har ei bord i klostersaum med ullgarn på stramei i m.a. blått, grønfargar, gult, orange, burgunderaud og svart. Raud botnfarge bind det heile saman. Motiv er ei stor rute på kant med ei åttebladsrose inni og to breie Andreaskors, fylt ut med ruter og trekantar. Dette er innramma av fleire taggerader og ei line med stilkesting. Kvarde av stripete silkeband øvst. Stripete sidefelt ved broderiet og eit svart midtfelt i jerseyliknande stoff, alt er montert på eit grovt stoff med breie striper. Det er brukt spreke fargar i broderiet og garnet er godt utnytta - legg merke til at det er brukt ulike grønfargar i dei to store korsa! Dette gjev likevel eit spennande uttrykk. Ein kan undra seg over om det svarte stoffet er sydd på i ettertid? 

Staseleg bringeklut med perlenett

Denne bringekluten frå Onarheim har eit perlenett på omlag 15 x 15 cm: Ei kvit 8-bladsrose er omkransa av firkantar med grøne, okergule og blå perler. Over 8-bladsrosa er det ei seperat bord av perlenett. Ytterlegare dekor er to silkeband øverst. Bakstykket er av ubleika lin eller bomull og er skøytt på nede med maskinsaum. Rutete sidefelt, blåstripete felt øverst. Det finst mange gamle bringeklutar med perlenett, og typisk er perlenettet  montert på raudt ullstoff, som her. Det uvanlege med denne bringekluten er den vesle borda av perlenett øvst. Evt. kan perlenettet ha tilhøyrd ein eldre bringeklut, men vore montert på nytt, for å høva til moten med lengre overliv. Men den historien kjenner me ikkje!