fredag 26. mai 2017

Laskatrøye med grøne silkekantar



Denne nydelege laskatrøya er fint kvara med grøn silke langs hals, framkantar og armar. Fôr av glansa bomullsstoff, gult oppe, raudt- og svartmønstra frå livet og ned, det same nedst på armane. Lukka med hekter/maljer i livet. 
Laskatrøya skal vera del av ei bruredrakt frå Onarheim som vart levert til Bergen Museum i 1912, saman med det raude overlivet med grøne silkekantar som eg tidlegare har blogga om. Trøya verkar profesjonelt sydd og ho er ikkje skøytt eller omsydd, men står fram som ein heilskap. Laskatrøya var ikkje eit ytterplagg, til det var gjerne brukt storsjal. 


Gul bringeklut


Denne uvanlege bringekluten består av to gule silkebitar, kanta med ein raud silkekvaring oppe. Det kan verka som det er brodert med plattsaum (i fargane rosa, blått, grønt, lilla, brunt) - eller det er brukt bitar av eit stoff med ferdig broderi? Den loddrette skøyten kan tyda på det. Men det var ikkje uvanleg med broderi som skulle likna brosjert silke! Silke var ein dyr og importert tekstil og småbitar av stoffet vart godt nytta. Bringekluten er montert på eit lerretsvevd bomull/linstoff som er falda langs kanten på framsida, dette stoffet dannar dermed også fôr. Bringekluten har eldre preg, og peiker bakover mot 1700-talet. 




fredag 19. mai 2017

Bringeklut med Hardangersaum



Forseggjort bringeklut med tett broderi på lin i hardangersaumsteknikk i fargane lilla, raudt, gult, grønt og kvitt/lyseblått. Motiv er halve 8-bladsroser,  Andreaskors og timeglas. Taggar med stoff eller band under det broderte feltet, i overgangen til det svarte midtfeltet. Sidefelt i trykt bomullsstoff i brunt og kvitt "vevmønster". Svart silkeband med roser oppe. Trykt "vevmønster" i sidefelt. Dette har nok vore ein bringeklut til stasbruk! Det var typisk for Tysnes at bringeklutane hadde ei bord oppe, men det geometriske mønsteret på denne tyder på ei litt eldre utgåve.







Bringeklut med bord oppe.



Denne type bringeklut med bord oppe var typisk for Tysnes dei siste 10-åra av 1800-talet. Perlebroderi på lin (eller liknande stoff) med tre roser i asymmetrisk mønster, samt små rosetter. Det er brukt raude, rosa, kvite, gull og svarte perler. Botnen er fylt ut med korsstyng i blågrønt ullgarn. Svart ullstoff i lerretsbinding i midtfeltet, omkransa av raud/blå rutete ullflanell. Silkeband med roser øverst. Bakstykke i kypertvevd lyst kanvas. Legg merke til dei spreke fargane i broderiet i kontrast til det heller ordinære rutete stoffet!



søndag 14. mai 2017

Nydeleg raudt overliv



Handsydd overliv i eldre snitt i raud silke eller glansa ullstoff - uansett har det vore eit stasliv som ber lite preg av bruk! Livet er kvara langs framkantar, hals og armhol med breitt, flott, brosjert silkeband i fargane raudt, grønt, gult og lilla. Blå/kvit rutete tjukk valk som stakken skulle hengja på. Valken kunne vera fylt med halm e.l. Fôret er av kypertvevd, ubleika bomullstoff. Ei hekte og krok viser i livet. Dette kan gjerne ha vore eit brureliv?


Grønt overliv i fløyel (plysj)



Handsydd eldre type kort overliv. Snittet peiker meir mot 1700-talet, kanskje det kan vera så gammalt? Overlivet er kvara med raud silke langs armhol, hals og framkantar. Slike kvaringar var ikkje skråklypt, dette vart vanleg fyrst i seinare tid. Vevde sølvband (kunne vera uniformseffektar!) innanfor silken, samt på  skuldrar og eit rett og to boga sølvband i ryggen. Sølvbandet går ikkje heilt rundt under armane og ikkje heilt ned framme eller i ryggen. Dette var evt for å spara på banda, men det var også mote. Seks par avlange, støypte snøremaljer framme. Spesielt med dette livet er at det har rund hals. Evt har det vore valk i livet. Det er blitt fortalt meg av eldre informant at fløyelsliv kom med koner (brurer) frå kysten!

fredag 5. mai 2017

Fantasifullt overliv


 

Dette spesielle overlivet vart innkjøpt til Bergen Museum i 1885. Det er handsydd og har eldre snitt med brei rygg og rette skuldrar. Mønsterteknikk er stofftrykk, evt maling på 2-skaft ullstoff. Kvara (kanta) med stripete band i raudt, grønt og kvitt, truleg av lin/silke. Men banda kjem i bakgrunnen for mønsteret i stoffet!.Fôr av ubleika grovt linlerret. Åtte par hol (etter maljer eller ringar) og lukka med hekte/malje i livet.


.

Brureliv frå 1849



Dette nydelege overlivet i glansa ulldamask frå 1849 skal vera del av ei bruredrakt frå Onarheim, innkjøpt av Bergen Museum i 1885. Kort overliv i eldre snitt med brei rygg og rette skuldrar. Det er handsydd, svært forseggjort og overlivet er sydd av heile stoffstykke. Fôr av kvitt linlerret. Grøne silkekvaringar langs armhol, hals, framme og på skuldrene. Framme er det merke etter snøremaljer. Høgde på rygg er berre 36 cm, men livet er uvanleg stort (vidt) og kan gjerne tilsvara dagens str 40-42.