Bringeklut med firblada motiv inf 10

 

Bringekluten har eit perla felt 14,5 x 15 cm på svart kypertvove stoff. Raud kvarde av ullstoff 4 cm, delvis dekka av ein 3,5 cm brei gullknipling med tre heile og to halve vifter. Motiv er ein fireblada blom av kvite stråperler, innramma av oker perler, med kvitt og blått gresk kors i midten og fire små Andreaskors av kvite og grøne perler. Blomen er omkransa av dobbeltkors nedst og halve korsformer på sidene. Det nedste feltet av burgunder bomullsstoff med trykt prikkemønster er skøytt midt på. Bakstykket er av stormønstrete lerretsvove stoff, skøytt vertikalt. Breidde 26 cm, høgde 22 cm. Svart bakgrunn på bringeklut skal ha vore til sorg. Fleire slike bringeklutar i boka mi om "Bringeklutar frå Tysnes".

Bringeklut med blå perler

 

Bringeklut frå siste del av folkedrakttida. Tilsvarande mønster kan ein sjå på fleire slike gamle bringeklutar, sjølv om ingen er heilt like. Bord på 10 x 14 cm med blå, svarte (mørkblå?) samt større kvite og store gyldne perler, montert på raudt "podepesj". Motiv er ti romber gruppert i tre store romber som grip i kvarandre, med ein  kvit Andreaskors i midten. Blå og svarte rader med perlelisser. Kvarde av svart fløyelsband med rosemønster, med ein gullknipling over. Grønt felt av ullstoff ca. 13 x 13 cm. Sidefelt av raudt bomullsstoff med trykte trekantar. Bakstykke av brunt og rosa stripete bomullsstoff. Bringekluten er montert for hand og er 28,5 cm høg, 29 cm brei øvst og 28 cm brei nedst. 

Bringeklut i dragestil

Bringekluten har ei bord i leggjesaum på 3,8 x 14,5 cm, sydd på stramei med grøn, raud og svart tråd, samt blå, gjennomskinlege og koparfarga perler. Motiv er fem stiliserte dragehovud på rad, ramma inn av to perlerader. På kvar side av borda to firkantar med paisleymønstrete bomullsstoff. Øvst ein kvarde av svart fløyelsband med rosemønster. Eit svart ullstoff på 25,5 cm (17,5 cm nedst) og 16,5 cm høgt er sydd fast med leggsaum til baksidestoffet av ubleika bomullsrenning med lin innslag, falda for hand.

Bringekluten er frå Gjersheim på Hamarhaug, som høyrde til Tysnes kommune til 1. januar 1907 då Hamarhaug vart overført til Kvinnherad kommune. Dragemotivet kan tyda på at bringekluten er frå kring 1900 eller før, då dragestilen kom på moten. Bringekluten har ei form som passar midjeside overliv, men er montert på eldre måte. 

Halsplagg av silke

Halsplagg av silke. Raud botn med blomemønster og ei ti cm brei bord i kvar ende med brosjert blomemønster i rosa, grønt, brunt m.m. Jare på begge langsider. Halsplagget måler ca. 90 x 9 cm og har omlag 5 cm lange frynser/duskar i kvar ende. Slike avlange halsplagg skal vera eldre enn dei firkanta silkesjala. Kanskje kan ein sei at dei var eit moteplagg til folkedrakta?

Perlebrodert belte

 

Beltet er overbrodert med perler sydd på stramei. Motiv er gjentakande rapportar av blå og kvite Andreaskors og kvite åttebladroser med raudt inni, fylt ut med gyldne, svarte og grøne ruter på kant, samt trekantar. Blå og kvite perler på langsidene. Strameien er bretta mot einnannan på baksida og kasta saman med lintråd, beltet er såleis utan fôr. Beltet måler 4 x 79 cm, inkl. ein ni cm lang skøyt. Lukka med to par hekter/maljer. Beltet kan ha vore brukt i siste del av folkedrakttida, eller truleg laga i seinare tid til "nasjonalen".

Bringeklut med ullgarnsbroderi

 

Bringekluten har ei bord på 15 x  6,4 cm, brodert på stramei med leggjesaum og korssting. Motiv er kors og tre ruter på kant av blått, lilla, svart, grønt og litt gult garn, raudt garn i botnen. Merk at det er brukt to nesten like raudfargar. Orange kors inni rutene kan vera bomullsgarn. Dei grøne stinga rundt rutene er holbeinsting. Blå brodert taggekant øvst og raude kontursting. Linje av raud klostersaum og kontursting nedst. Rader av små blå greske kors. Kvarde øvst manglar. Svart midtfelt av klede 14,5 x 14,5 cm. Innlegg av papir og lyst, kypertvove bomullsstoff. Bringekluten er montert for hand med svart tråd. Bakstykke av raudrutete, mønstervove bomullsstoff, same stoff i som i sidefelta. Ytre mål er høgde 25 cm, breidde 25,5 cm.

Stor Tysneshuve i svart fløyel

 

Tysneshuva består av to delar; det nesten runde bakstykket er flatt nedst. Det fasongskore framstykket er 11,5 cm høgt midt framme, sidekantar 15 - 18 cm breie inkl. kant. Fôra med ubleika lerret av bomull, evt. lin. Stoff og fôr er sydd saman med maskin, sårkant er kasta over. I halsopninga eit svart silkeband med mønster på 40 x 2,5 cm (0,5 cm på baksida) med eit 3 cm breitt svart ullstoff bak. Langt silkeband til å knyta bak og kvit skråklipt bomullslist som skulle titta farm under silkebandet manglar. Nedst ein smal svart 44 cm lang bomullskant med knyteband.

Fløyelshuve skal ha vore brukt til stor stas. Denne store Tysneshuve er nok frå då huvene tok til å gå ut or bruk og ofte vart veldig store, denne huva er 38 cm brei og 35 cm høg. Det er også sagt at huvene kunne bli laga etter omriss av baken! Tysneshuva kunne òg bli kalla svarthuve eller lurehuve.

Bringeklut med frodig mønster

Frodig bringeklut med perlenett i spiss, 10,5 cm breitt og 12 cm høgt. Det er rakna litt i ytterkant. Kvite, oker og grøne perler dannar eit rombeforma rutenett med kvite Andreaskors inni rutene. Det er truleg blitt perla med ei nål. Perlenettet er montert på raudt ullstoff 10,5 x 15 cm. Øvst på det raude feltet ein tre cm brei vifteforma gullknipling. Kvarde av 2,5 cm svart fløyelsband med rosemønster. Stormønstrete sidefelt av bomullsstoff med trykt blomemønster. Bakstykke av lyst bomullsstoff med blått mønster. Høgde 27 - 28 cm, breidde 23,5 - 24 cm. Dette perlenettmønsteret finn ein også på eldre bringeklutar som har breiare form.

Bringeklut med brosjert silkestoff

 

Bringekluten har eit raudt brodert felt på stramei og eit anna stoff, kan henda lin eller kanvas, med innslag av lilla, blått og svart. Motiv er Andreaskors og ruter på kant. Kvite små felt er ikkje brodert og dannar små kors. Teknikk er leggjesaum og korssting, samt mønsterborder i klostersaum og truleg attersting. Kvarde av svart fløyelsband med blomemønster. Midtfelt av blått silkestoff med brosjerte blomar/blad, dette stoffet går att i fleire bringeklutar frå Tysnes. Rutete sidefelt, lagt fint mot bakstykket av kypertvove ubleika bomull. Mål: Breidde 28 cm, høgde 24,5 cm.

Bringeklut med stråperler og rutete bakstykke

Bringekluten har dekor av kvite, blå, grøne og gyldne stråperler, samt småperler, montert på raudt klede, 16 cm breitt og 15 cm høgt. Motiv er eit stort Andreaskors omkransa av fire åttebladstjerner og små kors og rosettar. Ein 2,5 cm brei og 20 cm lang gullknipling med viftemønster er montert over kvarden av svart fløyelsband med rosemønster. Merk at den 1 cm breie kvarden av svart fløyelsband med rosemønster går tvers over heile bringekluten, kanta på baksida med 0,7 cm breitt blåmønstrete bomullsstoff eller band. Sidefelt av lyst glansa stoff, nedst eit mønstervove, fleirfarga felt. Bakstykke av blått/lyst rutevove bomull. Bringekluten er 28 cm brei, 23,5 cm høg og er montert for hand. 

NB: I morgon søndag 13. juli er siste dag for Bringeklut-utstillinga på Breidablikk Anno. Kl 11 - 15 og gratis adgang.

Grønt overliv med fine detaljar

   

Grønt overliv i klede (kan også vera peau de pêche) med fine detaljar. Kanta med to cm breie svarte fløyelsband med rosemønster med kvite perlelisser innanfor, unnateke ca. 5 cm under armane, 6 cm svart band midt framme. Overlivet er solid sydd for hand. Inni snippen er det ei ca. 7 x 7 cm forsterking. Fôret av rutevove brunt/blått bomullsstoff viser også ein cm på framsida. Fem hekter over valken (diam. 1,5 cm) til å festa i stakken, desse har ei forsterking på fôret. Artig detalj med perleremse av annakvar gule og kvite perler på skuldrene. Overlivet er lukka med tre par hekter/maljer. Mål: Høgde framme 33 cm, høgde rygg 37 cm, skulderbreidde 10,5 cm, høgde side 19 cm,  vidde liv ca. 64 cm. Smal rygg 9 cm i livet.

Overliv i plysj

 

      

Påkosta overliv i raud plysj med striper. Overlivet som har Hardangerpreg, er kanta med 2 cm breitt svart fløyelsband med rosemønster, samt 3 cm brei metallknipling, unnateke 5-7 cm under armane som er kanta med fløyelsband. Banda er sydd på for hand. Lukka i livet med tre par hekter/maljer, med eit 2,5 cm breitt belegg under. For- og bakstykke er fôra kvar for seg med laust vove ubleika lerret og sydd saman med maskin, saumane er kasta over. Banda er sydde på for hand. 2 cm brei dobbel lerretskant i livet. Mål: Høgde rygg 39 cm, skulderbreidde 13 cm, høgde side 22 cm, vidde liv ca. 80 cm, høgde midt framme 33 cm, breidde rygg 11 cm i livet. Overlivet er prega av Hardangerbunad, men med særpreg. Metallkniplingane er utan rutenett mellom viftene og er truleg maskintilverka.

Broderte selar med perler

Selar brodert med leggjesaum/korssting og perler. Svart ullgarn i botnen, raud brodert kant på langsidene. Rose- og bladmønster i raud-rosa, grønt, gult og beige ulltråd. Rapportar med kvite, gjennomskinlege, gule, svarte og blå perler. Bakstykke av ubleika lerret, kan vera lin. Mål: 94 x 4,3 cm, medrekna endestykke på 13,5 cm. To understykke på 6 cm med 2,5 cm lange handsydde knapphol, to i den eine, eitt knapphol i andre enden. Endestykka er sydde med maskin, elles er selane montert for hand. Broderte roser på selar, belte og bringeklutar vart mote mot slutten av folkedrakttida, ved overgangen til "nasjonalen". Dei geometriske formene med mykje symbol gjekk då meir og meir ut or bruk.

Perlebringeklut frå 1880-90 talet

Bringekluten har dekor av kvite, blå og gyldne stråperler, store gyldne perler og småperler, montert på raudt ullstoff 15 cm breitt og 17,5cm høgt. Eit innlegg av papp viser der stoffet er slitt. Motiv er eit stort Andreaskors omkransa av fire åtte-bladsstjerner og små kors. Metallknipling, 3,5 cm brei med vifte-mønster, montert over kvarden av svart fløyelsband med rosemønster, 3,4 cm brei og med eit belegg bak. Bakstykke av stripete bomullsstoff i ein kypertvariant. I sidefelta trykt bomullsstoff i stripe-og blomemønster, det nedste feltet er kan henda restar etter ei klutatrøye. Bringekluten er montert for hand og er 25,5 cm høg og 27,5 cm brei. Dette er ein typisk perlebringeklut som kan vera frå 1880- 90-talet. Dei perlebroderte bokstavane står for Anna Margrete Henriksdotter (1860-1932). 

Barneliv og forkle

 

   

Sjarmerande lite overliv og forkle frå 1930-talet. Overlivet i raud ulldamask er delvis sydd etter eldre snitt. Legg merke til at det er høgare på den eine sida. Det er kanta for hand med grøne 1,5 cm breie krokbragdband, også under armane, 0,5 cm belegg av lerret viser under bandet. Høgde rygg 29,5 cm, høgde side 14 cm, skulderbreidde 10 cm, vidde liv 63 cm, høgde foran 22 cm, breidde rygg 26 cm i livet. For- og bakstykke er fôra kvar for seg med ubleika lerret og sydd saman med maskin, saumane er kasta over. Lerretskant ca. 1 cm i livet. Kile 1 x 7 cm på forstykka. To par hekter/maljer i livet.

Forkle i bomull, 37 cm høgt og 39 cm breitt. Linning og tampar 4 x 69 cm. Forkleet er rynka inn 17 cm og sydd fast til linninga. Tamp på 4 cm i venstre side med liten knapp. Innfelt 2,5 cm brei engelsk blonde. Nedste del av forkledet i dobbel stoff, 7 cm høgt inkl. 3,5 cm brei engelsk blonde. Alle saumar med maskin

På biletet frå 1939 har Rannveig Hestad f. 1935 (fremst) på seg både overlivet og forkleet! Dei andre på biletet har på seg Hardangerbunad. Den gamle folkedrakta var forlengst gått ut or bruk. "Nasjonalen" var blitt stor mote som festdrakt.

Bringeklut med gammal silkekvarde

Bringekluten har dekor av kvite, blå og gyldne stråperler, samt småperler, montert på raudt to-skaft ullstoff, 13 cm breitt og 15 cm høgt. Motiv er eit stort Andreaskors med åttebladstjerne midt på og fire greske kors rundt, omkransa av små kors og rundingar. Gullknipling med viftemønster, montert over blålilla silke og fløyelsband med rosemønster. Brunmønstrete sidefelt. Baksidestoff av kypertvove sekkestoff/jute.Merk at den 2,5 cm breie kvarden av svart fløyelsband med rosemønster går tvers over heile bringekluten. Dette er montert på seinare, over ein 3 cm brei blålilla silkekvarde som det viser ei 6 mm brei stripe av under kniplingen. På baksida kan ein sjå den gamle monteringa med smale sidekantar av bomull. Bringekluten er montert for hand. Breidde øvst 28 cm, breidde nedst 27,5 cm, høgde 26,5 cm. 

Blå understakk i bomull

 

    

Understakk i blått bomullsstoff. Av totalt fem breidder. Dei to midtfelta er 14 cm breie. Midt framme og midt bak er det eit 9 cm langt og 0,5 cm djupt innsnitt. 31 cm lang splitt og 2,5 cm djupe legg i livet i venstre side. Ikkje sidesaum i høgre side. Ikkje linning, men eit 1,5 cm breitt skråklipt band på baksida. Vidde i livet 80 cm, høgde 72 cm. Det glatte, skråklipte feltet før kappa er 140 cm langt og 6 cm høgt med 3 x 2 biser sydd med gul tråd. Den 6 cm høge kappa er lagt i små legg, 0,5 cm fald nedst. 65 cm lange smale knyteband i venstre side. Dei lange saumane er ei blanding av fransk- og indresaum. Sårkant viser øvst på skråklipt felt på vranga. Understakken er svært slitt bak og er nok velbrukt. Stakken er professjonelt maskinsydd og må vera tidlegast frå seint på 1800-talet. Dette er meir eit "moteplagg", men kan gjerne ha vore brukt samstundes med Tysneshuve og sølje i halsen!

Velbrukt bringeklut

 

Denne bringekluten kom inn i samband med utstillinga av Bringeklutar frå Tysnes på Breidablikk Anno. Den har ei perlebrodert bord på stramei, 14,5 x 5 cm. Motiv er ruter på kant oppdelt av ein Andreaskors og omkransa av to åttebladroser. Kvarde 2,3 cm av svart fløyelsband med blomemønster. Kvite, gyldne og svarte perler, blå i botnen. Merk at borda ikkje har linjer som rammar inn motiva. Metallband 1,5 cm nedst med tre innvovne raude tråder. Svart felt av fløyel.14,5 x 16 cm. Bringekluten er montert for hand med svart tråd. Innlegg av fleire stofflag. Sidefelt og bakstykke av blått kypertvove bomullsstoff er i eitt samanhengande stykke, det er uvanleg. Liten skøyt nedst på eine sidefeltet. Bringekluten er slitt på baksida, dette tyder på mykje bruk. Mål: Breidde 26 cm, høgde 25/26 cm. Denne mønsterborda (med små variasjonar) finst på fleire bringeklutar frå Tysnes.

Bringeklut i smøyg

  

Dette er ein av dei over 150 ulike bringeklutane som blir vist i boka om Bringeklutar frå Tysnes. Teknikk er smøyg, med innslag av klostersaum, sydd på linstoff med tynt ullgarn i fargane raudt, blått, gult/oker og grønt. Det kvite linstoffet viser som trappeforma motiv rundt dei store rombane på høgkant. Bokstavane I (?), H, D og S er brodert nedst, dei siste med ein tjukkare ulltråd. Broderiet er supplert med korssting på sidene og bord med klostersaum øvst. Kvarde av 2,5 cm blå silke, med 1,5 cm breie grindvovne band på sidene. Montering liknar lappeteknikk. Bringekluten er utan innlegg og har bakstykke av stripete blått og kvitt stoff, kan vera lin. Breidde 24/25,5 cm, høgde 20 cm. 

Dåpshuve, truleg til gut.

Treblads barnehuve av burgunder damask, stoffet kan vera falma. Kanta med 1,5 cm brei blå silke og 2 cm brei gullknipling. Ca. 2 cm brei tyll-blonde langs framkanten, lagt i  0,5 og 2 cm breie folder. Dekor av tre greske kors eller åttebladroser av kvite/blå/gyldne stråperler og småperler. Dobbelt kors av stråperler bak. Sikksakk av blå/gyldne/kvite perler langs saumane. Mål: Vidde nedst 23,5, framme 27cm, sidestykke 10 x 10 cm. Midstykket måler bakfrå 6, 9 og  8 cm i breidde. Knyteband av ca. 18 cm smale bendelband. Huva er handsydd. Perlene er sydd gjennom til det ubleika fôret, truleg av lin. Huva kan likna mykje på huva i forrige innlegg, men har anna type stoff og kanting.

Huva sett bakfrå.

Raud barnehuve i ullstoff

 

Handsydd treblads huve i raudt ullstoff, kanta med 1,5 cm breie fløyelsband med roser. Innanfor fløyelsbandet framme er det ein 3,5 cm brei vifteforma gullknipling. Rundt heile huva, unnateke 7 cm midt bak, er det lagt ein 1,5 cm brei blonde i 0,5 cm djupe folder. Dekor framme og på sidene av tre åttebladroser av gyldne stråperler. Perlene er sydd gjennom til fôret av ubleika stoff, truleg lin. Kvite og blå perlelisser langs saumane. Vidde nedst 23,5 cm, vidde framme 27 cm, sidestykka måler ca. 10 x 10 cm.  Truleg dåpshuve til gut, jenter skal ha hatt grøne eller blå huver. Kan henda har denne huva vore brukt i lag med ei kristnebleie, som beskrive i forrige innlegg!

Kristnebleie eller dåpssmekke

Dåpssmekke med silke, perler, kniplingar og metallband som dannar eit stort gresk kors og fleire linjer, alt for å verna barnet. 2 og 3,5 cm breie sølvband, 2,5 cm breie gullkniplingar og snorer/"possement" er lagt i sinnrikt mønster. Vovne sølvband (galoner) lagt i kors er vanleg på eldre dåpssmekker. Eit raudt ullstoff (evt. er det peau de pêche, som er ein imitert fløyelsvevnad av bomull) dannar basis for dekoren. Fire perla åttebladroser rundt det greske korset, samt små kors av gråkvite perler over heile dåpssmekka. Merk at alle perlene er stråforma og ikkje runde. Alt er innramma av vovne sølvband og kanta med 1,25 cm blå silke, som viser litt på baksida. Silken har skråhjørne. Bakstykke av blomstete bomullsstoff. Alt er handsydd. Lengde 43 cm, breidde øvst 21 cm, breidde nedst 13 cm. Les meir om kristnebleie på lokalhistoriewiki.no.

Bringeklut med dobbel uttrekkssaum

Bringekluten har ei 14,5 cm brei og 10 cm høg bord i dobbel uttrekkssaum og klostersaum brodert på lin og montert over raudt vadmål. Ulltråd i mange fargar, hovudinntrykket er raudt. Ruter på kant og Andreaskors dannar eit Ave Verum monogram. Ei smal bord med klostersaum med ei rad små ruter på kant og ei rad med korssting med slyng mot kvarden (3 cm) av svart fløyelsband med rosemønster. Nedst ei rad korssting med dobbelt slyng. Midtfelt av svart klede, 15 cm høgt og 13-14 cm breitt. Sidefelt av lilla- og kvitspetta bomullsstoff, som er bretta litt over til bakstykket av kypertvove lyst stoff. Bringekluten er 28 cm brei og 30 cm høg.

Bringeklut med leggjesaum og perler

 

Bringeklut med grøn bord i leggjesaum og korssting, sydd på stramei. Perler i ulike fargar dannar fem store ruter på kant, kvar oppdelte av kløverbladkors til fire mindre ruter. Over den kvite kruneranda av perler er det blå leggjesaum eller korssting, som dannar eit sikksakk-mønster. Ei stor blå perlelisse er montert på den raude kvarden av ullstoff, voven i ein kypertvariant. Elles er borda inndelt av linjer i raudt, rosa, blått og gult. Bokstavar av gjennomskinlege perler, her er dei grøne stinga sydd i motsett retning. Stripete sidefelt, mønsteret er ikkje heilt parallelt. Blått bomullsstoff med blomemønster nedst. Bakside av kypertvove ubleika bomullsstoff. Bringekluten måler 27 cm øvst, 29 cm nedst og er 26 cm høg. Borda måler 14 x 6,5 cm, kvarden er 2 cm og det svarte feltet er 14 cm breitt og 10,5 cm høgt.

Skjortebryst for kvinner?

 

Skjortebryst for mann. Plagget er i bomull og er 28,5 cm breitt og 35 cm høgt midt framme To innfelte kiler på 7 x 9/10,5 cm, desse gjev også fasong til den 8 cm høge kragen. Halsopning 6 cm brei, ca. 3 cm høg midt framme. Dekor av hardangersaum med tre ruter på kant. Ei halv åtteadsrose i plattsaum øvst. Smal fald rundt, jare nedst. Alt er fint handsydd. Tilsvarande skjortebryst er blitt registrert i Fana.

Barnehuve - dåpshuve til gut

 

   

Treblads raud huve, truleg av "podepesj" med dekor av perlebrodert åttebladrose på toppen, omkransa av små oker rosettar. På kvar side og midt bak er det perla kløverbladkors. Kvite, blå, oker og grøne perler. Gull stråperler i åttebladrosa. Saumane er dekka av metallband, metallknipling og kvite perler langs framkanten. Huva er kanta med 1,5 cm brei grøn silke med gult sikksakk mønster, såkalla krokvaring. - Huva er sauma for hand med lintråd. Både dekor og montering er nydeleg utført. Delane er fôra kvar for seg (ikkje vrangsydd) med tynt ubleika og smalstripete stoff. Saumane er bretta til kvar side og sydd ned med kastesting. Perlebroderia er sydd gjennom til fôret. 30 cm langt knyteband av vinraud silke. Mål: Vidde nedst 23,5 cm, lengde framme 28 cm og sidestykka måler ca. 11 cm (høgde) x 9 cm. Truleg dåpshuve for gut, jenter skal ha hatt grøne eller blå huver.

Løyert

   
       

Løyerten er sydd av eit bomullsstoff med rutemønster i nedre del og eit lite liv, 25 cm breitt og ca. 14 cm høgt. Kroppsstykket er 60 cm langt og 80 cm vidt, rynka til livet. Løyerten er maskinsydd med smale saumar og blir lukka med to knappar på skuldrene. Den eine spissen på bakstykket blir tredd inn i ein 4 cm høg opning i den andre sida. Løyerten har band til knyting bak og blir knytt saman nede. Denne løyerten kan vera frå 1930- eller 40-talet, men truleg er dette eit plagg som har vore brukt før det. I Digitalt museum står det dette om løyert: "En løyert er et stort stykke stoff med seler over skuldrene og knapper eller bånd for å feste rundt barnet. Når barnet var nyfødt og seks uker fremover, ble løyerten brukt som sparkebukse (som ikke fantes på den tiden). Før barnet ble lagt i løyerten, ble det kledd i skjorte, trøye og bleier. I skrittet ble det brukt en gasbleie (skrittbleie). En flanellsbleie ble så brettet i trekant og lagt over gasbleien, og snippene ble lagt rundt barnet og festet foran. Deretter ble en flanellsbleie (ca 70x70 cm) lagt under og rundt barnet, hvorpå bleien ble dandert rundt beina for at barnet ikke skulle gni beina mot hverandre. Til slutt ble løyerten kledd på barnet og kneppet sammen".