torsdag 23. desember 2021

Umontert liten hjartebringeklut

 

Med dette vesle hjarta - som ein gong skulle bli ein liten bringeklut ønskjer eg ei God julehelg til alle som les og følgjer bloggen min:-)

Liten umontert bringeklut av raudt ullstoff, berre 19 cm brei og 14 cm høg. Hjarta på 7,5 x 10 cm kan også likna ein engel med sirkelen i midten, og venger på sidene. Det perlebroderte hjarta av kvite perler har ei åttebladsrose og to dobbeltkors, alt av stråperler, supplert med småperler. Påbegynt kant rundt hjarta av kvite og gull stråperler. Det er sydd inn tre små metallspenner, samt ei stor perle i spissen av hjarta. Kanskje er den halvferdige bringekluten laga av eit barn?


mandag 20. desember 2021

Lite raudt overliv med eldre trekk

 


Eit lite raudt overliv. Fôr av ubleika linlerret og ullstoff er sydd saman med maskin i sidene og på skuldrene, saumar er delte men ikkje kasta over. Overlivet er skøytt på 4,5 cm nede framme. Vidde rundt livet er 64 cm, høgde midt bak 37 cm, ryggbreidde i livet er 9 cm og skulderbreidde er 10 cm. Kvara med to cm brei, svart fløyel med kvit perlerad innanfor. Ein del perler er falle av eller fjerna på høgre framstykke. Det manglar tre cm fløyel og perler under ermane, dette er erstatta med eit smalt band. Overlivet er lukka med fire par hekter/maljer. Merke etter krokar i livet til å hekta stakken på. 



søndag 12. desember 2021

Silkesjal med ikatfarga mønsterbord




Velbrukt blått silkesjal med ikatfarga mønsterbord langs kantane. Dei vevde stripene går 9 cm inn frå kantane. Dette er importvare, som også høyrde med til dei gamledraktene, saman med heimlege tekstilar. Sjalet måler omlag 62 x 59 cm og har ein handsydd smal fald, jare på ei side.





mandag 22. november 2021

Svart forkle med striper og ruter



Dette svarte forkleet, truleg av ull og silke har striper og ruter i lilla/rosa. Det er handsydd, har jare på begge sider og er difor ikkje falda inn der. Høgde omlag 80 cm medrekna blonden på 4 cm, breidde 66 cm. I livet er det lagt tre djupe legg på kvar side av eit 11,5 cm breitt midtfelt og montert til ei 24,5 cm lang linning. Oppå linninga eit smalt og 101 cm langt svart band med siksakkmønster som ender i knyteband. Forkleet er falma på rettsida. Slike forkle var vanlege kring i Sunnhordland.


Detalj av stripemønster og blonde


søndag 14. november 2021

Kvinnesokkar i svart ullgarn


Kvinnesokkar i svart ullgarn. Heile sokken er strikka i glattstrikk, med auking og felling bak på leggen. Øvst er to cm bretta over på vranga, med ein fin taggekant i bretten. Lengde frå kne til hæl er 62 cm, fotlengde 22,5 cm. Vidde øvst er 17cm, ved ankel 10 cm, det same i foten (sju cm frå tærne). 


søndag 7. november 2021

Selar med perler og korssting


Selane har broderi med perler og korssting, truleg på stramei. Gjentakande rapportar av romber/Andreaskors med blå, svarte, raude og kvite perler, åttebladsroser i raudt garn og svarte, blanke og sølv perler. Botn er fylt ut med grønt, samt ei rad raudt garn. Langs ytterkanten eit fløyelsband med rosemønster, ein cm breitt. Selane er 5 cm breie, 81/82 cm lange medrekna eit ca 11 cm langt endestykke. Knapphol (2,5 cm) under hemper bak. Bakstykke truleg av ubleika linstoff. Selane verkar velbrukte og hempene bak er slitte og er delvis blitt fornya. Selane har maskinstikningar i kryss på endestykka og er delvis montert med maskin. Dei maskinsydde endestykka kan evt. vera sekundære.
 







mandag 1. november 2021

Bringeklut med bokstavar og raude roser



Bringekluten har ei tettsauma bord på stramei 7 x 14,5 cm med tre raude roser og grøne blad i garn og bokstavane AMMDH nedanfor, sydde med grøn/blå perler. Litt grøne, kvite, svarte og raude perler i roser og blad. Botnen er fylt ut med lilla garn. Grønt felt av ullstoff på 14 x 14,5 cm. Øvst ein kvaring av svart fløyelsband med rosemønster. Dette dekker eit smalare, slitt rosete band under. Både sidefelt og baksidestoff er av brunt/rosa/svart-rutete stoff. Monteringa med maskin er truleg sekundær, ikkje minst kan dei skråsydde hjørna tyda på dette. Ytre mål er 27 x 28,5 cm. 





mandag 25. oktober 2021

Bringekluten med bokstavar


Bringekluten har tettsauma broderi på stramei 6 x 13,5 cm med tre åttebladsstjerner og to romber, perleborder og bokstavane KKDV under, alt sydd med blanke perler, men supplert med oker, raudt og blått garn, omframt botnen som er fylt ut med leggjesaum i grønt ullgarn. Det blå og svarte feltet med diagonale ruter og små åttebladsroser måler kan vera eit silkestoff. Blå/kvite sidefelt 3 x 20 cm. Øvst ei stripe med blålilla silke og eit svart fløyelsband med rosemønster. Bringekluten er montert med symaskin, direkte på det stripete baksidestoffet, som også er falda med maskin. Ytre mål er 28 cm x 22 cm. Bringekluten har den breie forma som var vanleg i periden med korte overliv, men er nok frå etter 1870, både på grunn av maskinsaumen og at det er brodert på stramei og ikkje lin.
 




torsdag 14. oktober 2021

Raud ermetrøye i bomullsstoff

                                       


Forseggjort klutatrøye i bomullsstoff, raud botn med svart stjernemønster. Under knapphola er det eit rutete belegg på omlag fire cm. Trøya er lukka med ti knappar/knapphol framme og ein knapp/knapphol på kvar mansjett. Trøya er maskinsydd og har smal rygg (11,5 cm i livet). Fôret av ubleika linlerret og det raude stoffet er sydd saman både i bol og ermar og saumane er kasta over for hand. Skråklipt kant 1 x 35 cm i hals. Dei vide ermane (21/22,5 cm) er sydde glatt til bolen, men lagt i legg til mansjettar som måler 19 x 3 cm. Vidde over brystet er 80 cm, livvidde 68 cm, rygghøgde 36 cm, høgde i sidene 18 cm, skulderbreidde 11 cm og ermane er 59/56 cm lange. Sekundært er det sydd to innsnitt for hand på 1,2 x 11 cm, 7- 8 cm frå framkantane. Slike ermetrøyer, som ofte var raudlege med mønster i, høyrer til den seinare perioden av folkedrakta. Ein kan sjå enkelte foto av kvinner i ermetrøye og (truleg) grønt overliv langt inn på 1900-talet.








torsdag 7. oktober 2021

Svart forkle med broderi



Dette handsydde forkleet har brodert mønster i grønt, lilla og blått. Teknikk er attersting og plattsaum. Stoffet er tynt ullstoff, truleg i satengbinding. Heil høgde er 78 cm, medrekna blonden på 7 cm. Breidde nede er 65 cm. I livet er det lagt tre folder (breidde omlag 2 cm) på kvar side ut frå eit glatt parti på 5 cm, breidde omlag 2 cm. Nede er det ein smal fald sydd med små faldesting, blonden er festa bak saumen. Den smale linninga på 18,5 cm er dekka av eit svart fløyelsband med rosemønster. Hekte i kvar side av linninga. -  Av og til dukkar det opp slike spanande plagg som liksom ikkje passar inn i folkedrakta. Her har det nok vore ei kreativ sjel som har laga sitt eige spesielle forkle!


Detalj av broderi som er mest like fint på vranga!



mandag 27. september 2021

Broderte selar i linstoff



Desse staselege selane er brodert med korssting og holbeinsaum på raudt linstoff i lerretsvev. Gjentakande mønster av åttebladsroser og romber i fargane grønt, ubleika, gult og lilla. Det er brodert med tynt ullgarn, det kvite kan vera lingarn. Motiva er litt avlange p.g.a. vevnaden i stoffet. Bokstavane PLSD er brodert på framme, krune og årstalet 1870 bak. Selane er kanta med svarte band og silkesnor. Framme er det to sett med hemper, eit par stripete og eit par einsfarga. (seks og ni cm lange). Bak er det to sju cm lange hemper av band. Bakstykket er av tynt ubleika linstoff. Selane er montert for hand og er 6 cm breie og 82,5 cm lange, medrekna eit 20,5 cm endestykke bak som berre er falda og er utan fôr. At selane er montert saman verkar sekundært, dette er gjort med grove kastesting. Det er tenkjeleg at dette har vore brudgomsselar!











torsdag 23. september 2021

Bringeklut med bokstavar


Bringekluten har tettsauma korsstingsbroderi på stramei, 5,5 x 14 cm med ei heil og to halve åtte-bladsroser i raudt garn og perler, samt to perla romber. Bokstavane AMMDH er sydd med kvite perler. Botnen er fylt ut med grønt ullgarn. Broderiet er omkransa av broderte border og blå kroklisser. Felt av svart ullstoff 14,5 cm br og 15 cm hø. Kvaring med svart fløyelsband med rosemønster øvst. Brun- og beigerutete flanell både som sidefelt og bakstykkestoff. At det er brukt same stoff i sidefelt og bakstykke tyder på ein seinare bringeklut, også fordi monteringa er gjort med maskin. Evt. kan bringekluten vera remontert sidan bokstavar var meir vanleg på eldre bringeklutar. Grunna strameien er bringekluten uansett ikkje eldre enn frå kring 1870. Ytre mål er 29 x 25,5 cm.



fredag 17. september 2021

Brodert sele eller kvinnebelte?




Brodert sele eller kvinnebelte? Truleg har dette fyrst vore brukt som mannssele og seinare som kvinnebelte, spenna kan evt. tyda på det. Korsstingsbroderiet på stramei har seks gjentakande rapportar, kvar på 12 cm i raudt, lilla, olivengrønt og gult ullgarn, samt blanke perler. Botnen er fylt ut med svarte sting. Raud brodert stripe langs begge sider. Nonfigurativt mønster, her ser ein ikkje den symbolbruken som ein gjerne finn i gamle geometriske motiv. Montert for hand på eit bakstykke av brun- og svartrutete bomullsstoff. Ytre mål er 75 x 4 cm.





søndag 5. september 2021

Bringeklut med stjernemotiv


Bringekluten har eit felt på 10,5 x 14,5 cm av tettsauma korsstyng, truleg på stramei. Det er brodert med ullgarn i fargane raudt, grønt, kvitt og orange/oker, botnen er fylt ut med blå/lilla garn. Motiv er åttebladsstjerner, romber og Andreaskors som grip i kvarandre. Raudt felt av ullstoff øvst (4,5 x 14,5)  med to cm gullknipling i same lengde. Rutete sidefelt i ullflanell i brunt med litt lilla, liknande stoff kan ei finna på andre bringeklutar. Bakstykkestoff av blå- og kvitstripete .bomullsstoff, ein kant av dette viser også framme på bringekluten. Alt er montert for hand. Ytre mål er breidde 25 og høgde 24 cm.



søndag 29. august 2021

Mansjettar til kvinnedrakt


Nydelege mansjettar av kvitt bomullsstoff, maskinsydde med stikning langs kantane. Lengde 20/22 cm og høgde 6,5 - 7 cm. Den knipla to cm breie blonden med "nett", tunger m.m. er sydd fast 3/4 cm inn på rettsida av mansjetten. Mansjetten blir lukka med to knappar og knapphol med 4,5 cm mellomrom. - Fine små plagg som også kan ha vore brukt til stasbruk i overgang mellom folkedrakt og moteplagg, framom ei ermetrøye eller seinare ei knappetrøye. Sidan mansjettane er maskinsydde må dei vera frå tidlegast siste tiåra av 1800-talet. Kanskje det er nokon som kjenner til slike brukt på Tysnes?

mandag 9. august 2021

Også ein slitt bringeklut


Handsydd perlebrodert bringeklut: Kvite, blå og gule/orange/brune stråperler og runde perler på svart ullstoff. Hovudmotiv er to åttebladsroser og små rosettar. Raud ullkvaring øvst. Bringekluten er montert på gråbrunt ullstoff som er slitt slik at baksidestoffet kjem til syne under. Det spettete stoffet nede er kanskje sydd på i ettertid. Bringekluten har eldre preg og er nokså slitt, men den høge forma peiker også litt framover i tid, då overliva tok til å bli lengre. Svært lik forrige bringeklut, truleg frå same eigar.

søndag 1. august 2021

Ein slitt bringeklut




Handsydd, perlebrodert bringeklut: Kvite, gull og blå stråperler på svart ullstoff, sydd på med kvit lintråd. Motiv er åttebladsrose og greske kors. Raud fløyelskvaring og kvit, taggete perlerad øvst. Sidefelt av bomullsstoff med trykte motiv, gammalrosa og blå. Ein kant av baksidestoffet av strie eller jute viser også framme. Bringekluten er nokså slitt og har eldre preg, men den høge forma peiker også litt framover i tid, då oveliva tok til å bli lengre. 




søndag 11. juli 2021

Grønt overliv


 
Overliv av tjukt ullstoff/vadmål, med tilbaketrekte sidesaumar. Rygghøgde er 38 cm, breidde over ryggen 40 cm, smalnar inn nede til ni cm. Svarte fløyelsband med mønster i  orange, grønt og blått i hals, framme og rundt heile armhola (men på eldre type overliv går ikkje banda saman under ermane). Metallband innanfor. Skoning/kant av rutete bomullsstoff i livet, med fire krokar til å hekta stakken på. Fôr av kvitt lerret. Det meste er handsaum. Overlivet har vore lukka med hekter/maljer i livet. Dette overlivet høyrer til den seinare folkedrakta.

søndag 4. juli 2021

Bringeklut brodert på både lin og stramei

 


Broderi i raudt, blålilla, grønt, gult og svart ullgarn på linstoff som også viser som kvite innslag i motivet. Borda måler 16 x 6 cm. Teknikk er klostersaum og smøyg. Motiv er romber med greske kors inni. Tettsydde border i fleire fargar rammar inn broderiet, desse er sydd på stramei. I midten eit felt med svart ullstoff 16 x 15,5 cm. Rosastripete sidefelt. Ytre mål  er 28 x 28 cm. Bringekluten verkar handsydd. Baksidestoff av flanell med rombemønster i beige, brunt og lilla. Dette er montert slik at ein kant viser framme. Det spesielle her er at det er nytta både lin og stramei som underlag for broderiet. Bringekluten høyrer til den seinare folkedrakta. 



onsdag 23. juni 2021

Halvskjorte med holsaum framme


Halvskjorta av bomull er sett saman av eit langt rektangulært stykke på 82 x10,5 cm og to framstykke på 33 x 18 cm, mesteparten av venstre side manglar. Handsydd smal fald rundt, jare er nytta nede. Krage 35,5 x 5,5 cm med enkel uttrekksaum med rombemotiv, taggar øvst. Ein cm tett striperynking. Denne halvskjorta har ikkje brodert bringelist framme, dette skal heller ikkje ha vore vanleg på gamle Tysnes-skjorter. Her er berre ein fin holfald midt framme.






torsdag 17. juni 2021

Trebladshuve til barn



Trebladshuve, truleg dåpshuve. Ei fin huve som er sett saman av både kjøpte- og heimlege materialer. Handsydd med kvit lintråd. Sidestykka, som er 13 cm høge framme og 11 cm breie nede er av stry - eller linstoff, det same kan knytebanda med raudt mønster vera. Midtfelt (5,5/8 cm breitt) av brokade med brosjerte blomar og blad i raudt, grønt og gult på lilla botnen. Vevd band nede med hjarte- og rombemotiv. Raude kantar i silke og brokade. Fôr av lys brun stry eller lin. Dei tradisjonelle huvene av denne typen har vore brukt fleire stader i Noreg på slutten av 1700-talet og byrjinga av 1800-talet. Dei er ofte samansett av fleire typar stoff, dette kunne vera restar av stoff brukt i andre plagg, dette gjev oss informasjon om stofftypar som har vore i bruk.


fredag 11. juni 2021

Svarthuve til kvardags

Stor konehuve av svart tjukt ullstoff/vadmål. Huva består av eit nesten rundt bakstykke og eit fasongskore framstykke. Fôr av grovt ubleika lerret. Vadmål og fôr er sydd saman med maskin, slik at sårkanten (kasta over for hand) er synleg inni huva. Kvara rundt ansiktsopninga med skråklipt svart vadmålslist, svart silkeband på framsida. Svart kant av bomullsstoff i halsen, med løpegang midt bak til ei snor av hamp. Breidde midt bak 37 cm, høgde midt bak 35 cm. Dette har truleg vore meir ei kvardagshuve, ettersom huva har einsfarga fôr, kanten nede er einsfarga svart og har snor av hamp. Men silkekanten langs ansiktsopninga er på plass, dette verkar obligatorisk på dei fleste bevarte huver. Kvit bomullslist manglar, har evt. heller ikkje vore på denne huva pga status som kvardagshuve. At dette er ei seinare huve ser ein både på storleiken og på maskinsaumen.



onsdag 2. juni 2021

Bringeklut med bladmønster



Øvst er bringekluten kvara med svart fløyelsband med rosemønster. Strameiborda på 6 x16,5 cm har korssting i grønt ullgarn som dannar bakgrunn for perlebroderte blad i ulike fargar. Perleborder over og under broderiet, samt kvite perletaggar nedst. I midten eit svart ullstoff på 14,5 x 16,5 cm. Lillla rutete og raudblomstrete sidefelt friskar opp bringekluten, det siste er kan henda stoff ein har hatt liggjande. Baksidestoffet av mørk grønt bomullsstoff dannar også ein to cm kant nedst. Ytre mål er 28 x 27/24 cm. Klassisk bringeklut frå siste del av folkedrakta, "figursydd" til smal livlinje. Bladmønster er typisk for denne periden, då ein gjekk meir vekk frå symbolbruk, til rein dekor. 



mandag 24. mai 2021

Bringeklut med store og små kors av stråperler

 

Bringekluten har perlebroderi på raudt, lerretsvove ullstoff 15 x 13/11 cm. Kvite, blå og gyldne stråperler, store blanke perler, samt små perler dannar eit stort gresk kors over eit Andreaskors og munnar ut i fire mindre greske kors. Svart fløyelsband med rosemønster og gullknipling øvst. Små- og storrutete sidefelt, det nedste er heller slurvete montert! Bringekluten er stiva opp med papp. Baksidestoff av brun/beige rutete bomullsstoff. Ytre mål er 22 x 24/21cm.  Bringekluten har høg form og skrår inn nedst, kan difor tidfestast frå siste tiår av 1800-talet. Evt. kan perlebroderiet vera eldre og remontert i ny form. 



tirsdag 18. mai 2021

Tysneshuve - svarthuve


Tysneshuve av tjukt ullstoff/vadmål, fint sydd og godt bevart. Huva er 38 cm brei og 34 cm høg og består av eit nesten rundt bakstykke og eit fasongskore framstykke, fôra kvar for seg og så sydde saman slik at sårkantane (kasta over for hand) viser inni huva. Fôret i denne huva er av brungrått ullstoff i fiskebeinsmønster, men dette kunne variera mykje. Skråklipt kvit bomullslist er festa (under eit svart silkeband) i ansiktsopninga. Denne kvite lista (som kunne sprettast av og vaskast) var tidlegare av lin og til bestbruk, kan vera rest etter eit underlin på 50 x 50 cm som vart lagt over håret. Då vart det også brukt valk under huva. Nedst er huva kanta med fløyelsband med rosemønster, med eit raudt trekkband til å regulera vidda. Gifte kvinner hadde svart huve med svart kvaring og svart silkeband som vart lagt rundt huva og knytt i nakken. Dette huvebandet er 125 cm langt og 3 cm breitt og har ei hempe med påtredde perler i kvar ende. Det går historiar om at mønsteret til huvene vart laga ved at kona sette seg og huvemønsteret vart rissa etter baken. Og Tysnes-huene vart etter kvart store! Tysneshua, også kalla lurahuve, vart brukt av enkelte eldre kvinner til langt inn på 1900-talet, faktisk opp til 1940-åra. 




Huveband

Detalj av huveband