Bringeklut med perlebord: Borda er sydd på stramei, samt tettare teljestoff nedst, og måler 14,5 x 5,5 cm. Leggjesaum/krossaum i raudt ullgarn dannar bakgrunn for perledekor; ruter på kant/Andreaskors og åttebladroser (med blå sting under perlene). Gjennomskinlege, blå og raude perler. Rader med perler og sting. Bomullsstoff med trykt mønster både i sidefelt og bakstykke. Kvarde av 2,2 cm breitt svart fløyelsband med rosemønster. Midtfelt av svart fløyel 14 x 13. Ytre mål er 26 x 26 cm.
Bringeklut med brodert bord som er sydd på stramei med klostersaum i raudt, blått, grønt, lilla, burgunder, rosa og svart ullgarn og måler 14,5 x 6,5 cm. Motiv er ruter på kant/greske krossar, som ei krunerand. Rader med klostersaum (små ruter på kant) og attersting. Kvit perlelisse nedst. Kvarde av 2,5 cm breitt svart fløyelsband med rosemønster. Rutevovne sidefelt, trykt, stort mønster nedst. Bakstykke av ubleika kypertvove bomullsstoff. Svart midtfelt i fløyel 15 x 15 cm. Ytre mål: 27 x 32 cm.
Bringeklutane stammar frå same familie på Reksteren. Dei har tilhøyrt enten Gjertrud Marie Haukafær (1878–1968) eller hennar eldre søster, Ragnhild Sofie Johannesdtr. Øvra-Haukafær (1867–1897). Mor deira var Sisilia Larsdotter Aase (1835–1904). Gjertrud si dotter var Ingrid Borgen (f. 1916), som er mor til Grethe J. Hjertaker. Det er Grethe som har teke vare på bringeklutane, stor takk til henne for gåva av plagga.
Bringeklutane kan likna på kvarandre, men har likevel kvart sitt særpreg: Begge har kvarde av svart fløyelsband med blomemønster. Den eine har ei brodert bord med perler og leggjesaum/krossaum, den andre har ei bord i klostersaum og ei perlelisse nedanfor borda. Begge har eit midtfelt av svart fløyel, og det same stormønstra stoffet nedst.
Ingen kommentarer:
Legg inn en kommentar